ليه تسمع؟
خمسة بينزس بودكاست بيناقش استراتيجيات نمو الشركات بمختلف احجامها على الإنترنت والسوشيال ميديا. بيناقش برضه أفكار تساعد رواد الأعمال و مسؤولي التسويق والفريلانسرز على تحقيق الإستفادة القصوى من وقتهم والموارد المتاحة لهم لتحقيق أكبر عائد مادي و غير مادي من مجهوداتهم.
امتى تسمع؟
أحسن وقت تسمع فيه البودكاست هو الوقت اللي بيكون أصلا “ميت” أو ضايع بس تكون تقدر تركز فيه زي:
- المواصلات
- الرياضة
- انتظار دور في مصالح حكومية, بنوك….الخ
- أعمال منزلية
أحسن حاجة إنك تعمل روتين عن طريق أحد تطبيقات البودكاستس بحيث يكون دايما عندك مجموعة من الحلقات الجاهزة بمجرد ما تنزل من البيت/المكتب تدوس بلاي وتبدأ تسمع.
إزاي تسمع؟
البودكاست متاح برضه على Spotify و أنغامي ولكن برشح الإستماع عن طريق زر “استمع الآن” لإنه بيقوم بتوجيهك لافضل تطبيق بشكل تلقائي و لو ملقاش تطبيق مناسب على جهازك هيديك اختيارات و أي اختيار فيهم هيكون جيد.
ليه مفيش ساوند كلاود و يوتيوب؟
ده سؤال بييجي كتير فـخليني أجاوب عليه. بالنسبة ليوتيوب هو طبعا عليه جمهور كبير بس فكرة البودكاست الأساسية إنك تقدر تاخده معاك وتسمعه في أي حتة وطبعا يوتيوب مش هيساعدك في كده لأنه “هيشفط” الداتا/الباقة و هو أصلا مش منصة مصممة للبودكاستس. أنا عايز اشجع موضوع إنك تسمع البودكاست في الوقت الضايع جدا ومش حابب يكون فيه يوتيوب حاليا للسبب ده.
ساوند كلاود الأسباب مماثلة. هي منصة مش مصممة أصلا للبودكاستس ومتعملتش لده. لو بتتابع أي بودكاست أجنبي نادرا جدا ماهتلاقيه متاح على ساوند كلاود. كمان التطبيقات المخصصة للبودكاستس المذكورة فوق هتساعدك أصلا تكتشف بودكاستس تانية مفيدة كتير و هتساعدك تخلي الموضوع “روتين” أو “عادة” مفيدة انت بتعملها على طول. التطبيقات دي مصممة خصيصا لكده ومش هتندم أبدا إنك نزلتها. خلي عندك ثقة فيا كده و ادي العيش لخبازه.
تبدأ منين؟
الناس اللي لسه بتبتدي ممكن تحس إنها تايهة في المحتوى وعايزة حد يدلها على نقطة البداية. ده سبب وجود الجزء ده عشان يكون زي “فهرس” يخليك تقدر توصل للمحتوى الخاص بالمبتدئين بسرعة وهيتم تحديثه بإستمرار إن شاء الله.
- إزاي تبدأ تبيع منتج أو خدمة على الإنترنت – الحلقة 3
- إزاي تبدأ فريلانسينج و العمل الحر من خلال الإنترنت – الحلقة 4
- إزاي تبدأ تتعلم التسويق الإكتروني والفرق بين الناس الشاطرة والعادية في المجال – الحلقة 5